"Azərbaycan Fransa əlaqələri uzun müddətdir ki, çox surətlə inkişaf edir".

Bu sözləri Axar.az-a açıqlamasında millət vəkili Fuad Muradov deyib. Millət vəkilinin sözlərinə görə, oktyabrda baş tutacaq Azərbaycan və Fransa prezidentlərinin zirvə toplantısı hər iki ölkə üçün strateji əməkdaşlıq baxımından əhəmiyyətlidir:

"Fransa ATƏT-in Minsk Qrupunun üzvü olduğu üçün məsuliyyət və öhdəlikləri böyükdür. Ölkədə çox sayda ermənilərin yaşamasına və bunun ölkənin siyasətinə təsirinə baxmayaraq, Fransa dövləti Azərbaycanla səmərəli əməkdaşlığa böyük maraq göstərir. Əlbəttə ki, bu cür tərəfdaşlıq qarşılıqlıdır. Belə olan halda iki ölkə arasındakı münasibətlər strateji əməkdaşlığa çevrilə bilər. Hesab edirəm ki, bu cür zirvə toplantıları hər iki ölkə üçün həm münasibətlərin tənzimlənməsində, həm də mədəni əlaqələrin inkişafında əlverişli rol oynayacaq".

F.Muradov son zamanlar iki ölkə arasında sürətlə inkişaf edən mədəni əlaqələrə də toxundu:

"Heydər Əliyev Fondunun prezidenti xanım Mehriban Əliyevanın uzun müddətdir ki, Fransanın müxtəlif şəhərlərində mədəniyyət sahəsində dəstək layihələrini həyata keçirməsi bunun bariz nümunəsidir. Bu yaxınlarda Parisdə Luvr muzeyinin xüsusi İslam bölməsinin təmirinə Fondun maliyyə dəstəyi, Marsel və digər bu kimi şəhərlərdə mədəniyyətə dəstək layihəsinin davam etdirilməsi Azərbaycan üçün iki ölkə arasında mədəni əlaqələrin inkişafı baxımından olduqca dəyərlidir".