"Real vəziyyətin şahidi olduqdan sonra Ukraynadakı durumun heç də ürəkaçan olmadığı qənaətinə gəlmək çətin deyil".

Bu sözləri Axar.az-a Ukrayna səfərindən yenicə qayıtmış "Atlas" Araşdırmalar Mərkəzinin rəhbəri Elxan Şahinoğlu Kiyevdəki vəziyyəti şərh edərkən deyib.

Kiyevdəki son durumla daha yaxından tanış olan politoloq real vəziyyəti belə şərh etdi:

"Ukraynada vəziyyət həqiqətən ağır olaraq qalır. Hazırda ölkə 26 oktyabrda baş tutacaq parlament seçkilərini keçirməyə hazırlaşır. Müxtəlif qüvvələr arasında mübarizə gedir. Böyük ehtimalla Poroşekonun bloku seçkilərdə qələbə çalacaq. Ancaq parlament seçkiləri o demək deyil ki, bu, Ukraynadakı problemləri aradan qaldıracaq. Çünki Kiyevdə hələ də həllini gözləyən müxtəlif problemlər var. İşğal faktı, büdcə boşluğu, ölkənin kredit ala bilməməsi, qaz və başqa istiqamətlərdəki problemlər dəhşətli qışdan xəbər verir. Poroşenko çox qətiyyətli siyasət yürütməyə çalışır. Prezidentin elan etdiyi yeni "strategiya- 2020" adlanan planında 60-a yaxın islahatla bağlı paket var. Burada korrupsiya ilə bağlı mübarizə, kredit, enerji aksionunun azadılması kimi məsələlər əsas tutulub. Əlbəttə ki, çətin olacaq, çünki müharibə davam edir. Hələ ki Rusiya separatçılara dəstəyini əsirgəmir. Əgər Poroşenko problemləri addım-addım həll edə bilməsə, Ukraynada vəziyyət yenidən gərginləşə, Prezidenti də eynilə Yuşenkonun taleyi gözləyə bilər. Bildiyimiz kimi, Yuşenkonu da xalq hakimiyyətə gətirdi və sonradan seçkilərdə çox acı məğlubiyyətlə üzləşərək dörd faiz reytinqlə hakimiyyətdən getməli oldu. Buna görə də Poroşenko elan etdiyi islahatları yerinə yetirə bilməsə, siyasi vəziyyət əvvəlkindən ağır olacaq. Bu da Ukraynada aranın yenidən qarışmasına gətirib çıxara bilər".