Dünya bazarında neftin qiymətlərində enmə və qalxmalar hələ bir müddət də davam edəcək.

Bu sözləri Axar.az-a neft qiymətlərinin ilin sonuna qədər necə dəyişəcəyi ilə bağlı suala cavabında Neft Araşdırmalar Mərkəzinin rəhbəri İlham Şaban deyib.

“İlin sonuna qədər neftin qiymətini proqnozlaşdırmaq çətindir. Hər halda dekabrın 6-na qədər neft qiymətlərində volatilik, yəni dəyişikliklər normal qəbul edilməlidir. Çünki bazarda qeyri-müəyyənlik davam edir. Məsələn, OPEK-in neft hasilatını 1,6 milyon barrelədək azaldacağı ilə bağlı informasiyalardan sonra neftin qiymətlərində artımlar baş verdi. Paralel olaraq ABŞ-ın Enerji İnformasiya Administrasiyası ölkədə neft ehtiyatlarının kəskin artdığını açıqladıqdan sonra isə qiymətlər yenidən 58 dollara düşdü. Hələ ki, bazarda stabillik yoxdur, buna görə də neftin qiymətlərində enmə və qalxmalar baş verir”, - ekspert bildirib.

Qeyd edək ki, uzun müddətdir ucuzlaşan neftin qiymətində ötən gündən cüzi artım qeydə alınıb.