"Ermənistan öz taleyini düşünməlidir".

Bu sözləri Axar.az-a politoloq Vəfa Quluzadə Azərbaycan və Ermənistan prezidentlərinin Paris görüşünü şərh edərkən söyləyib.

O, Rusiyanın Ermənistana təqdim edəcəyi heç bir şeyin qalmadığını bildirib:

"Əgər Paris görüşündə həqiqi irəlləyişlər olsaydı, bu barədə açıq sürətdə bəyanat verilərdi. Bunun deyilməsi daha çox xeyir gətirərdi. İşğal olunmuş torpaqların azad olunması, müharibə vəziyyətinə son qoyulması önəmli məqamlardır. Eyni zamanda, hazırda dünyada vəziyyət dəyişir. Məsələn, əvvəl status-kvo mövcud idi. Rusiya Cənubi Qafqaza nəzarət edirdi. İndi isə vəziyyət dəyişib. Çünki Qərblə Rusiya arasında elan olunmamış müharibə gedir. Müharibə Ukraynada davam edir. Bu isə iqtisadi, siyasi və digər bütün metodlarla aparılır. Belə şəraitdə bağlı qapılar arxasında Rusiya ilə Qərb arasında hazırkı vəziyyətin dəyişəcəyi zaman necə hərəkət ediləcəyi ilə bağlı müzakirələr aparıla bilərdi. İndi Ermənistan öz taleyini düşünməlidir. Çünki Rusiya Ermənistana heç bir şey təqdim etmək iqtidarında deyil. İrəvan artıq yavaş-yavaş müstəqil addım atmağa hazırlaşmalıdır. Bu görüşdə ona xidmət edə bilərdi".