İran liderləri hesab edir ki, Suriyada Əsəd problemi ortadan qalxandan sonra növbəti hədəf İran olacaq.

Bu sözləri Axar.az-a İsrailin Suriyadakı İran qüvvələrinə genişmiqyaslı hücumuna münasibət bildirən beynəlxalq əlaqələr üzrə ekspert Elşən Mustafayev deyib. O bildirib ki, İsraillə İran arasında olan münasibətlər həmişə gərgin olub:

“Qarşılıqlı təhdidlər və bəyanatları mütəmadi eşidirik. İki ölkə arasında zaman-zaman kiçik hərbi toqquşmalar da yaşanıb. İsrail İrana qarşı davamlı, genişmiqyaslı hərbi əməliyyatlar keçirtməkdə maraqlı deyil. Çünki nəticənin hər iki tərəfə böyük ziyanının olacağını bilir. Amma eyni zamanda özünü bütün vasitələrlə hər zaman qoruyacağını bəyan edir. Bunu təzyiq kimi qəbul edərək İranın Suriyadan çıxacağına isə inanmıram. İran illərdir ki, iqtisadi sanksiyalar altındadır. Bir neçə il öncə ABŞ Prezidenti Barak Obama bu sanksiyaları aradan qaldırsa da, sonradan İran ABŞ-ın sərt reaksiyası ilə üzləşəcəyini bilə-bilə Suriya məsələsində Əsəd rejiminə dəstək oldu. Tramp prezident seçiləndən qısa müddət sonra daha sərt şəkildə sanksiyaları bərpa etdi. Bütün bunlar onu deməyə əsas verir ki, istənilən təzyiq altında İran Suriyadan çıxmayacaq”.

Ekspertin sözlərinə görə, İran Suriyada Əsədin ortadan qalxmaması üçün addımlar atır:

“Maksimim şəkildə Rusiya ilə birlikdə Əsədə dəstək olur. Eyni məsələyə Rusiya ilə baxışlarının üst-üstə düşməsi də Tehranın Suriyadan çıxmayacağı ilə bağlı ehtimalları gücləndirir. Proseslər qaynar fazaya kecəcəyi halda isə Suriyadan çıxıb, ya çıxmamağın önəmi qalmayacaq”.

Qeyd edək ki, dünən İsrail hərbçiləri Suriyadakı İran silah anbarları və bir neçə hava hücumundan müdafiə batareyalarına qırıcılardan zərbə endirib.