Problemləri həll etmək səlahiyyəti Azərbaycan hakimiyyətindədir və o da bu işləri görür.

Bu sözləri Axar.az-a Bakı Şəhər İcra Hakimiyyətinin (BŞİH) Milli Şuranın fevralın 23-nə təyin etdiyi mitinqlə bağlı qərarı haqda danışan millət vəkili Musa Qasımlı deyib. Deputat hesab edir ki, BŞİH-in Milli Şuranın mitinqinə icazə verməməsi düzgün qərardır:

“Çünki ölkəmizdə həm dövlət və hökumət orqanları, həm də hər birimiz üçün ən vacib məsələlərdən biri vətəndaşın təhlükəsiz, rahat şəraitdə yaşaması və ictimai asayişin qorunmasıdır. Əgər ictimai qayda-qanun pozulursa, vətəndaş küçəyə çıxa bilmirsə, dinc həyatı təhlükəyə düşürsə, belə mitinqlər heç kimə gərək deyil. Mitinqə gedənlərə və təşkilatçılara xatırlatmaq istəyirəm ki, insan iki şeyin qədrini sonradan bilir: can sağlığı və sabitliyin. Qarışıqlıq yaratmaq istəyənlər Yaxın Şərqə baxsınlar. Heç bir azərbaycanlı oradakı əhalinin vəziyyətinə düşmək istəmir. Ona görə də mitinqlərin təşkili zamanının ötüb keçdiyi qənaətindəyəm”.

Millət vəkili qeyd edib ki, mitinqlərdə heç bir şey həll olunmur:

“Problemləri həll etmək səlahiyyəti Azərbaycan hakimiyyətindədir və o da bu işləri görür. Qarışıqlığa yol vermək olmaz. Ölkəmiz islahatlar yolu ilə inkişaf etməlidir. Xalq tərəfindən bəyənilən və müdafiə edilən həmin islahatları da cənab Prezident həyata keçirir”.

Qeyd edək ki, Bakı Şəhər İcra Hakimiyyəti (BŞİH) Milli Şuranın fevralın 23-nə təyin etdiyi mitinqə icazə verməyib.