Rusiya Liberal Demokrat Partiyasının sədri Vladimir Jirinovski yenə qeyri-adi bəyanatla gündəmə gəlib.

Axar.az xəbər verir ki, partiya rəhbəri ölkəsinin qərbə yox, cənuba doğru irəliləməsinin vacib olduğunu deyib:
"Xarici siyasətimizin əsas sistemi budur: I Pyotrdan başlayan səhvlər davam edir. Qərbin diktəsi ilə hərəkət edirik. İngiltərə bizi İsveç, Polşa və Türkiyə ilə müharibəyə təhrik etdi".

Rusiyanın cənuba meyl etməli olduğunu deyən Jrinovski Türkiyə, İran və Əfqanıstana vaxtında müdaxilənin indi bu ölkələrin rus dilində danışması ilə nəticələnə biləcəyini deyib:

"Siyasətimizin ana xətti cənub olmalıdır. Ancaq bu yolla maksimum müvəffəqiyyətə çata bilərik. Cənubda Türkiyə, İran və Əfqanıstan bizi gözləyir, Afrika və Vyetnam deyil. Yalnız Türkiyə, İran və Əfqanıstan! Bu ölkələr bizimlə dost olmaq istəyir. Əgər biz bunu biraz tez reallaşdırsaydıq, indi bu üç ölkə rusca danışacaqdı. Cənub meyvə, tərəvəz, isti, turizm və tətil deməkdir. Oralarda bizim şimalda əkdiyimiz nemətlər yoxdur".