Misir, Birləşmiş Ərəb Əmirlikləri (BƏƏ), Yunanıstan, Cənubi Kipr və Fransanın Şərqi Aralıq dənizindəki vəziyyətlə əlaqədar ortaq bəyanat yayması qeyri-qanunidir. Çünki Türkiyə və Liviya arasında imzalanmış dəniz bölgələrinin delimitasiyası anlaşmasını Liviyanın BMT tərəfindən tanınan qanuni hökuməti imzalayıb.

Bu sözləri Axar.az-a açıqlamasında siyasi ekspert Vüqar Zifəroğlu Türkiyə və Liviya arasında imzalanmış dəniz bölgələrinin delimitasiyası anlaşmasına Misir, BƏƏ, Yunanıstan, Cənubi Kipr və Fransanın ortaq bəyanat verməsini şərh edərkən deyib.

O bildirib ki, digər ölkələrin Türkiyə və Liviya arasında imzalanmış razılaşmaya reaksiya bildirməsi Liviyanın daxili işinə qarışmaq deməkdir:

“Türkiyə və Liviya arasında imzalanmış dəniz bölgələrinin delimitasiyası anlaşması bir çox ölkənin maraqları ilə üst-üstə düşmür. Məhz bu səbəbdən Misir, BƏƏ, Yunanıstan, Cənubi Kipr və Fransa Şərqi Aralıq dənizindəki vəziyyətlə əlaqədar ortaq bəyanat yayıb. Diqqət yetirsək, görə bilərik ki, bu ölkələrin hamısı Türkiyənin regionda güclənməsini istəmir və Ankaraya qarşı münasibətləri də soyuqdur”.

Ekspert bildirib ki, bu, birbaşa Türkiyəyə qarşı atılan bir addımdır və tamamilə qanunsuzdur:

“Türkiyənin son bir neçə ildə Aralıq dənizində təbii yanacaq axtarışları və bu yöndə imzaladığı müqavilələr bu ölkələri narahat edir. Əvvəlcə onu deyim ki, Türkiyə bu yöndə ilk addımı Şimali Kipr ilə Aralıq dənizində hidrokarbon yataqlarının axtarışına dair sazişlə atmış oldu. Lakin bu kifayət deyildi. Bu mənada Türkiyə Liviya ilə daha fərqli bir müqavilə imzaladı. Bu müqavilə Aralıq dənizində su sərhədlərinin Türkiyənin xeyrinə dəyişməsinə gətirib çıxardı. O dövlətləri “narahat edən” bu səbəblərdir”.