"Rusiya Avropanın mərkəzində nüvə müharibəsinə başlayacaq qədər ağlını itirməyib".

Axar.az xəbər verir ki, Rusiyanın Avropa Birliyi ilə münasibətləri qırdığı bir vaxtda Polşa ilə münasibətlərdə də gərginlik yaranmağa başlayıb. Polşa Prezidenti Bronislav Komorovskinin Rusiya ilə bağlı açıqlaması və Qərb mətbuatı tərəfindən geniş şəkildə şərh edilən "nüvə müharibəsi təhdidi" Avropa ilə Rusiyanın arasındakı gərginliyin daha da artacağına işarə edir.

Bu barədə politoloq Vüqar Zifəroğlu məsələyə şərh bildirərkən Rusiyanın Polşa ilə nüvə müharibəsinə getməyəcəyini bildirib. O, bu məsələnin bir balaca şişirdildiyini qeyd edib:

"Bəli, Rusiya xarici siyasətində hər zaman sərt mövqeyilə seçilən bir dövlət olub. Eyni zamanda heç bir zaman öz imperialist maraqlarından bir addım belə olsun geri çəkilməyib. Lakin bu o demək deyil ki, onlar Avropanın mərkəzində nüvə müharibəsinə başlayacaq qədər ağıllarını itiriblər. Rusiya heç bir zaman belə bir addım atmaz. İkincisi də Moskvaya hazırda postsovet məkanında özünü təsdiq etməsi lazımdır. Ukraynada baş verənlər, Avrasiya İttifaqı layihəsi, Gömrük Birliyi ideyası – bunların hamısı Rusiyanın bu məkanda öz varlığını qəbul etdirmək üçün atdığı addımlardır. Ukraynadakı proseslərin belə bir axarla cərəyan etdiyi bir vaxtda Rusiya Şərqi Avropanı hədəf götürməz, nüvə silahının tətbiqindən söhbət belə gedə bilməz".

Proseslərə digər bir aspektdən də yanaşan politoloq hadisələrin Rusiyanın adı ətrafında manipulyasiya edilməsini siyasi taktika kimi səciyyələndirib:

"Bunu əslində iki istiqamətdə şərh etmək mümkündür:

1. Rusiya özü qəsdən belə informasiyalar dövriyyəyə buraxaraq, ətrafında bir qorxu imici formalaşdırır. Məqsəd isə əsas hədəf olan postsovet məkanında özü ilə bağlı bir qorxu formalaşdırmaqdır;

2. Bu cür informasiyaları Qərb dövriyyəyə buraxır. Məqsəd Rusiyanı qorxulu kabus kimi göstərmək və zamanı gələndə Şərqi Avropadan Rusiyaya qarşı istifadə etmək üçün meydan formalaşdırmaqdır.

Hər halda, hadisələrin nə cür cərəyan edəcəyini zaman göstərəcək".