Azərbaycan Milli Mətbuatının 140 illiyi ilə əlaqədar tədbirlər planı hazırlanır.

Bu barədə Axar.az-a Kütləvi İnformasiya Vasitələrinə Dövlət Dəstəyi Fondunun sədri Vüqar Səfərli bildirib.

KİV DF sədrinin sözlərinə görə, hələlik mətbuatın yubileyi ilə bağlı hansı yeniliklərin olacağı məlum deyil:

"Hazırlanan tədbirlər planı ilə əlaqədar yaxın günlərdə məlumat veriləcək. Yubileylə əlaqədar harada, nə tədbirləri keçiriləcəksə, elan olunacaq. Hazırda bu işlər üzərində iş gedir. Hansı əlavə yeniliklər nəzərdə tutulubsa, bununla da bağlı məlumat verəcəyik".

Qeyd dək ki, iyun ayının 22-də Azərbaycan milli mətbuatının 140 illiyidir. Bu yubileyin keçirilməsi haqqında Azərbaycan prezidenti sərəncam imzalayıb. Sərəncamda Həsən bəy Zərdabi tərəfindən əsası qoyulmuş Azərbaycan milli mətbuatının keçdiyi yola və mətbuatın çağdaş durumuna nəzər salınır.

Sərəncamda Prezident Administrasiyasına tapşırılır ki, Kütləvi İnformasiya Vasitələrinin İnkişafına Dövlət Dəstəyi Fondu və Mətbuat Şurası ilə birlikdə yubiley tədbirlərinin keçirilməsini təmin etsin.

Sərəncama əsasən, Azərbaycan milli mətbuatının inkişafında xidmətləri olan jurnalistlər mükafatlandırılacaq. Bunun üçün jurnalist təşkilatları və redaksiyalar 1 ay müddətində təkliflərini verməlidir.