Rusiya Qərbə Yaxın Şərqdə var olduğunu göstərməyə çalışır.

Bu sözləri Axar.az-a açıqlamasında son günlərin aktual mövzusu olan rus hərbçilərinin Suriyaya yeridilməsi məsələsini şərh edərkən analitik Vüqar Zifəroğlu deyib:

"Bu məsələyə birtərəfli yanaşmaq olmaz. Rusiyanın Suriyaya qoşun yeritməsi əslində aksiya xarakteri daşıyan və düşünülmüş bir plandır. Ona görə də Kremlin bu addımını üç istiqamətdə dəyərləndirmək lazımdır. Birincisi, Rusiya hazırda Qərbə Yaxın Şərqdə var olduğunu göstərməyə çalışır. İkincisi, Suriya Rusiya üçün prinsipial əhəmiyyət daşıyır. Birmənalı şəkildə vurğulamaq lazımdır ki, Əsədin iqtidarda qalmasının başlıca səbəblərindən biri məhz rəsmi Moskvadır. Bu səbəbdən də Rusiyanın son addımını hazırda Əsəd rejiminə dəstək kimi qiymətləndirmək olar. Üçüncüsü isə Moskva hazırda terrora qarşı mübarizədə koalisiya qüvvələrinə dəstək verdiyini nümayiş etdirməyə çalışır".

Qeyd edək ki, son günlərdə Rusiyanın Suriyaya hərbi qüvvə göndərməsi ilə bağlı Qərb mətbuatında xəbərlər yayılıb. Rusiya tərəfi isə bu iddiaları təkzib edir.