Ankarada sol düşərgənin keçirdiyi aksiyada baş verən terror olayı bir çox məqamları ilə diqqət çəkir.

Bu barədə Axar.az-a açıqlamasında analitik Vüqar Zifəroğlu deyib. O, Ankarada 100-ə yaxın insanın ölməsi ilə nəticələnən terror aktı ilə bağlı bəzi məqamlara toxunub:

"Ankarada sol düşərgənin keçirdiyi aksiyada baş verən terror olayı bir çox məqamları ilə diqqət çəkir. Həmin məqamlar bunlardır: partlayışın məhz HDP-çilərin olduğu ərazidə baş verməsi; terrordan dərhal sonra social şəbəkələrdə və beynəlxalq mediada HDP lehinə sistemli təbliğatın qurulması; "Terrora inad səsim HDP-yə" şüarının təbliğat vasitəsinə çevrilməsi…

Seçkilərə 20 gün qalır və HDP-nin iri şəhərlərdə olan mövqeləri ciddi şəkildə laxlayır. Belə olan halda isə ortaya yalnız bir sual çıxır. Bu terror hadisəsi hansı qüvvələrə daha çox lazım idi və hansı tərəfin lehinə işləməkdədir? HDP hazırda böyük təlaş içərisindədir. Ta əvvəldən onların fəaliyyətlərinin əngəllənəcəyi təqdirdə bu cür yollara əl atacağı məlum idi.

Bir sözlə, Türkiyəni qarşıda çətin günlər gözləyir, bu cür terror hadisələri yenidən təkrarlana bilər.

Ümumiyyətlə, seçkiyə qədər istər daxili, istərsə də xarici qüvvələr Türkiyədəki stabil vəziyyəti pozmağa çalışacaqlar və bunun üçün müxtəlif yollara əl atmaqdan çəkinməyəcəklər".

Qeyd edək ki, oktyabrın 10-da Türkiyənin paytaxtı Ankarada Dəmiryolu stansiyasına gedən körpünün altında partlayış baş verib. Son məlumata görə, partlayış nəticəsində 95 nəfər həlak olub, 246 nəfər yaralanıb.