Azərbaycan hökuməti staqnasiya meyillərindən özünü qorumaqdan ötrü lazımı tədbirləri görməkdə davam edəcək.

Bu sözləri Axar.az-a açıqlamasında Prezident İlham Əliyevin Nazirlər Kabinetinin 2015-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş 12 oktyabr iclasındakı nitqini şərh edərkən politoloq Tofiq Abbasov deyib.

Onun sözlərinə görə, Prezident İlham Əliyevin Ermənistanın Azərbaycana qarşı yürütdüyü işğalçı siyasətə özəlliklə bir daha toxunması Qarabağın azad olunmasının gündəlikdə əsas strateji məsələ olduğunu göstərir:

"Bu, o anlama gəlir ki, Qarabağ məsələsi həllini tapmayana qədər Azərbaycan hərbi potensialını gücləndirməkdə addımlar atmaqda davam edəcək. Buna görə də hərbi sənayenin, müdafiə gücünün, hücum vasitələrinin günün tələblərinə cavab verməsi yolunda müvafiq büdcə xərcləri artacaq. Prezident bir daha yada saldı ki, əgər ermənilərin Azərbaycana qarşı təcavüzü olmasaydı, hərbi xərclərin bir qismi sosial-iqtiasadi sahəyə yönəldiləcəkdi. Bu, çox önəmli bir ismarıcdır. Lakin hələlik ordu quruculuğuna hesablanmış vəsaitlər davamlı şəkildə təyinatı ilə xərclənməlidir ki, düşmənin gündəlik təxribatları adekvat cavabını alsın və son mərhələdə Azərbaycanın işğal altında olan əraziləri azad edilsin".

Politoloq hesab edir ki, son müşavirə sosial yönümlü iqtisadiyyatın bir nömrəli sahələrində xüsusi rejimin olması vacibliyini ortaya qoydu:

"Bununla yanaşı dövlət başçısı iqtisadi, sosial, fiskal sahədə olan vəziyyətlə bağlı aktual problemlərə toxunmaqla bildirdi ki, müvafiq orqanlar tərəfindən aparılan monitorinqlər, vətəndaşların narazılıqları islahatların ünvanlı şəkildə aparılmasını tələb edir ki, zəif nöqtələr aradan götürülsün. Sosialyönlü iqtisadiyyatın bir nömrəli hədəfi istehsal, istehlak və təminat məsələlərində xüsusi rejimin olmasını tələb edir və yerlərdə cavabdehlik daşıyan orqanlar problemli vəziyyət yaranana qədər lazımı tədbirlər görməlidirlər ki, gərginlik yaranmasın".

Politoloq bildirib ki, ölkə başçısı iclasda daha iki mühüm mesaj verdi:

"Prezident qlobal vəziyyətə toxunaraq diqqəti dünyada hökm sürən iqtisadi böhranla bağlı bildirdi ki, Azərbaycan staqnasiya meyillərindən özünü qorumaqdan ötrü lazımi tədbirləri görməkdə davam edəcək. İlk növbədə aztəminatlı təbəqəyə aid ailələrdə sosial sıxıntıların minimuma endirilməsi gündəmdə olacaq. İkincisi isə infliyasiya, istehsalat indeksinin enməsi, işsizliyin artması kimi dünyada geniş yayılmış problemlərin Azərbaycan reallığında zərərsizləşirilməsi istiqamətində göstərilən səylər vəziyyəti qənaətbəxş saxlamağa imkan verəcək".

Qeyd edək ki, Prezident İlham Əliyev Nazirlər Kabinetinin 2015-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş 12 oktyabr iclasındakı yekun çıxışında rüşvətxorluq, korrupsiyaya qarşı ciddi addımlar atılması gərəkdiyini vurğulamışdı. Bundan əlavə, prezident ölkədə müəyyən strukturların bir-birini təkrarladığını və ona görə də ciddi islahatlara ehtiyac yarandığını bildirmişdi.