Mərkəzi Seçki Komissiyasının (MSK) sədri Məzahir Pənahov noyabrın 1-də V çağırış Milli Məclisə keçirilmiş seçkilərdə 5547 seçki məntəqəsindən daxil olmuş yekun protokol məlumatlarına əsasən seçkilərin nəticələrini açıqlayıb.

Axar.az xəbər verir ki, son nəticələrə görə, 14 saylı Xəzər Seçki Dairəsindən namizədliyi irəli sürülən Heydər Əliyev Fondunun prezidenti Mehriban Əliyeva ən yüksək nəticə ilə, 96,7 faiz səslə millət vəkili seçilib.

İkinci yerdə Naxçıvan MR Ali Məclisinin sədri Vasif Talıbov gəlir. 1 saylı Şərur-Sədərək Seçki Dairəsindən namizədliyi verilən V.Talıbov səslərin 89,4 faizini qazanıb.

123 saylı Kəlbəcər Seçki Dairəsindən Cavid Qurbanov 84,9 faiz, 45 saylı Abşeron Seçki Dairəsindən Oqtay Əsədov 84,2 faiz, 4 saylı Naxçıvan şəhər Seçki Dairəsindən Eldar İbrahimov 83,6 faiz, 17 saylı Yasamal üçüncü Seçki Dairəsindən Elşad Həsənov 82,1 faiz və 116 saylı Qəbələ Seçki Dairəsindən millət vəkili seçilən Fəttah Heydərov səslərin 80,6 faizini qazanmaqla ən yüksək nəticə əldə edən deputatlar siyahısına düşüblər.

Yüksək nəticə ilə qələbə qazanan deputatlarımızla bərabər, aşağı nəticə ilə mandat əldə edən parlamentarilər də az deyil. 31 saylı Suraxanı ikinci Seçki Dairəsindən millət vəkili seçilən Fərəc Quliyev səslərin 38,6 faizini toplayıb. 40 saylı Kəpəz ikinci (Gəncə) Seçki Dairəsindən deputat seçilən Musa Quliyev 47,3 faiz, 92 saylı Zərdab-Ucar Seçki Dairəsindən Jalə Əliyeva 51,2 faiz, 19 saylı Nərimanov birinci Seçki Dairəsindən Hikmət Məmmədov 51,9 faiz səslə ən aşağı nəticə ilə qalib gələn namizədlərdir.