Putinin aktual tələb kimi boğazlar məsələsini önə sürməsi çox böyük ağısızlıq olardı.

Bu sözləri Axar.az-a açıqlamasında politoloq Zərdüşt Əlizadə deyib. O bildirib ki, iki ölkə arasında münaqişəli vəziyyət Türkiyə tərəfindən boğazların bağlanması həddinə qədər gəlib çatmayacaq:

"Ancaq bu baş verərsə və Türkiyə buna gedərsə, Rusiyanın boğazları güc yoluyla açmaq kimi bir imkanı olmayacaq. Eyni zamanda, ənənəvi silah sahəsində türk ordusu ruslardan qat-qat güclüdür. Əgər Rusiyanın Türkiyəyə qarşı nüvə silahı tətbiq etmə ehtimalı yaranarsa, əminəm ki, ABŞ və Qərb buna çox qəti şəkildə etiraz edəcək. Çünki belə bir hədə olduğu şəraitdə ABŞ və Qərb NATO üzvü olan bir dövləti müdafiə etməsələr, alyans bir təşkilat kimi dağıla bilər. Yəni NATO-nun əhəmiyyəti ondan ibarətdir ki, təşkilata üzv olan dövlətlər heç bir təhlükədən çəkinmirlər. Türkiyə bilir ki, NATO onun arxasındadır. Odur ki, boğazlar məsələsində güc işlətməkdən heç söhbət belə gedə bilməz. Buna nə Türkiyə, nə də Rusiya gedə bilər. Ona görə ki, bu, çox həssas və təhlükəli bir məsələdir. Hazırda iki ölkə arasında münasibətlər olduqca gərgindir. Parisdə davam edən konfransda Ərdoğanla Putin arasında görüş baş tutmasa, liderlər çox böyük diplomatik səhvə yol vermiş olacaqlar".

Qeyd edək ki, Kremlin sözçüsü Dmitri Peskov bir qədər öncə verdiyi açıqlamasında Türkiyənin Qara dənizdə boğazlara girişi qadağan etməsinin faciəyə yol aça biləcəyini deyib.