Qorbaçova və onun başcılıq etdiyi ölkəyə tarixin özü hökm oxuyub.

Bu barədə Axar.az-a politoloq İlqar Vəlizadə danışıb. O, Azərbaycanda və dünyanın müxtəlif ölkələrində bir çox cinayətlərə imza atan Qorbaçovun hələ də beynəlxalq axtarışa verilməməsini çox böyük səhv adlandırıb:

"Qarbaçov kimiləri öz cinayət addımları ilə əslində SSRİ-nin varisi olan Rusiyanın cinayət məcəlləsini pozublar. Təəssüfər olsun ki, Qorbaçov nəinki heç bir məsuliyətə cəlb olunmayıb, o hətta Nobel sülh mükafatına da layiq görülüb. Bu, həmin nüfuzlu mükafat üçün çox böyük bir ləkədir. Dünyada hökm sürən ikili standartlar bu məsələdə də qabarıq şəkildə öz əksini tapıb. Qorbaçova və onun başcılıq etdiyi ölkəyə tarixin özü höküm oxuyub. O, nəinki Azərbaycanda, həm də Tiflis, Riqa, Vilnüs, Alma Atada da bir çox cinayətlər törədib. Onun hələ də beynəlxalq axtarışa verilməməsi çox böyük siyasi səhvdir. Əlbəttə, Qorbaçovun məsuliyyətə cəlb olunması çətin məsələdir. Buna ilk növbədə Qərb imkan verməz. Hazırda isə Qərbdə çox güclü himayədərları olan Qorbaçova qarşı beynəlxalq axtarış elan olunmamasının arxasında çox güclü siyasi məqamlar dayanır".

Qeyd edək ki, 1990-cı il yanvarın 19-da Mixail Qorbaçov SSRİ Konstitusiyasının 119-cu, Azərbaycan SSR Konstitusiyasının 71-ci maddələrini kobud şəkildə pozaraq, yanvarın 20-dən Bakıda fövqəladə vəziyyət elan edilməsi haqqında fərman imzalayıb. Yanvarın 19-dan 20-nə keçən gecə Bakıda sovet ordusu tərəfindən dinc əhaliyə qarşı dəhşətli, kütləvi qırğın hadisəsi törədilib. Sovet ordusunun qoşunların qanunsuz yeridilməsi nəticəsində Bakıda və respublikanın rayonlarında 147 nəfər öldürülüb, 744 nəfər yaralanıb, 841 nəfər qanunsuz həbs olunub, onlardan 112 nəfəri SSRİ-nin müxtəlif şəhərlərinə aparılaraq həbsxanalarda saxlanılıb. Hərbi qulluqçular tərəfindən 200 ev və mənzil, 80 avtomaşın, o cümlədən təcili yardım maşınları məhv edilib, yandırıcı güllələrin törətdiyi yanğınlar nəticəsində külli miqdarda dövlət əmlakı və şəxsi əmlak sıradan çıxıb.