İsrail şərtlərimizi yerinə yetirsə, səfirimizi göndərib, lazımi addımları atacağıq.

Axar.az xəbər verir ki, bu sözləri Türkiyənin Xarici İşlər naziri Mövlud Çavuşoğlu deyib.

Onun sözlərinə görə, yekun razılaşma üçün İsrail Türkiyədən HƏMAS-la əlaqələri kəsməyi istəməyib:

"Türkiyə ilə İsrail arasında görüşlər davam edəcək. Bizim şərtlərimiz bəllidir. Bunlar yerinə yetirilərsə, səfirimizi göndərib, lazımi addımları atacağıq. Qəzzaya tətbiq edilən blokada ləğv olunmalıdır. Buradakı fələstinli qardaşlarımız çətin vəziyyətdədir. Humanitar yardımlar problemsiz şəkildə Qəzza və Fələstinə çatmalıdır. Yekun razılığın olması İsrailin mövqeyindən asılıdır. HƏMAS məsələsində problem olacağını düşünmürəm. Bizim HƏMAS-la olan münasibətlərimiz heç kimə sirr deyil. Yaxın Şərqdə HƏMAS-sız sülh olmayacaq. İsraillə münasibətlərimizin normallaşması üçün HƏMAS şərti yoxdur".

İyunun 26-da Türkiyə və İsrail rəsmiləri arasında görüş gözlənilir.

Xatırladaq ki, İsrail 2010-cu ilin mayında Qəzza bölgəsinə humanitar yardım aparan Türkiyə gəmilərinə hücum edib və bundan sonra iki ölkə arasında diplomatik münasibətlər dayandırılıb.