Oyun baxımından daha artığını gözləyirik. Komandamız fərqlidir. Doğma meydanda böyük hesabla məğlub olsaq da, komanda şəklində daha yaxşısını edə bilərik və sabah buna cəhd edəcəyik.

Axar.az xəbər verir ki, bu sözləri “Araz-Naxçıvan”ın baş məşqçisi Elmar Baxşıyev UEFA Konfrans Liqasının III təsnifat mərhələsində “Omoniya” ilə keçiriləcək cavab oyunundan öncə təşkil olunmuş mətbuat konfransında deyib.

Mütəxəssis rəqibin təcrübəli, yaxşı təşkilatlanmış komanda olduğunu bildirib:

“Amma yaxşı nəticə qazanmaq üçün çalışacağıq. Hesabı kənara qoysaq, Bakıda istədiyimiz oyunu göstərə bilmədik. Amma bunlar arxada qaldı. Komanda şəklində daha yaxşısını edə bilirik. Burada havanın temperaturu Bakı ilə demək olar, oxşardır. Rütubət bir qədər çox hiss olunur. Amma bu, futbolçulara problem yaratmamalıdır”.

“Araz-Naxçıvan”ın hücumçusu Çarlz Boli isə matçla bağlı bunları söyləyib: “Futboldur, belə nəticələr olur. Birinci oyunu unutmuşuq. Sabahkı matçda daha yaxşı nəticə qazanacağımıza ümid edirəm. Düzdür, oyun çətin, gərgin olacaq, ancaq biz hazırıq. Rəqibi yaxşı tanıyırıq. Onlara qarşı bir neçə dəfə oynamışam. Kiprin ən güclü komandalarından biridir. Lakin inanıram ki, “Araz-Naxçıvan” sabahkı oyunda istəyinə çatacaq”.

Qeyd edək ki, görüş avqustun 14-də Kiprdə təşkil olunacaq. İlk matçda “Omoniya” 4 cavabsız qolla qalib gəlib.