Ağdamın "Qarabağ" komandasının futbol üzrə UEFA Çempionlar Liqasının qrup mərhələsindəki rəqibləri ölkə çempionatlarında növbəti görüşlərini keçiriblər.

Axar.az xəbər verir ki, Azərbaycan təmsilçisinin sentyabrın 27-də Bakı Olimpiya Stadionunda qəbul edəcəyi İtaliyanın "Roma" komandası öz meydanında "Verona"nı 3:0 hesabı ilə məğlubiyyətə uğradıb. Üçüncü tur çərçivəsində keçirilən matçda Raca Nainqolan bir qol vurub, Edin Ceko isə dubl edib. Hazırda İtaliya çempionatında altı xal toplayan "Roma" komandası "A" seriyasında doqquzuncu sırada qərarlaşıb.

Ağdam klubunun qrupdakı digər rəqibi İspaniyanın "Atletiko Madrid" kollektivi öz meydanında "Malaqa"ya minimal hesabla qalib gələrək hesabına üç xal yazdırıb - 1:0. Oyunda vurulan yeganə qolun müəllifi Antuan Qrizman olub. Dörd turdan sonra səkkiz xala malik İspaniya təmsilçisi La Liqada "Barselona" və "Real sosyedad"ın ardınca üçüncü pillədədir.

"Qarabağ"ın Londonda məğlub olduğu İngiltərənin "Çelsi" komandasının isə Premyer Liqada ev oyununda "Arsenal" ilə qarşılaşması heç-heçə başa çatıb - 0:0. Hazırda beş oyundan sonra aktivində on xal olan “Çelsi” turnir cədvəlində üçüncü yerdədir.