Klublar arasında Avropa Çempionlar Liqasının növbəti təsnifat mərhələsi çərçivəsində bu gün 20:30-da keçirilməsi nəzərdə tutulan futbol matçının ucuz biletləri qara bazara yol tapıb.

Axar.az xəbər verir ki, bu barədə fotobloqçu Mehman Hüseynov özünün Yutub səhifəsində video yerləşdirib.

1 manatlıq biletlərin dəllallar tərəfindən 5 manata satılması videoda əks olunub.

Məsələ ilə bağlı AFFA-nın ictimaiyyətlə əlaqələr şöbəsindən Firuz Abdulla Axar.az-a açıqlamasında oyunun təşkilatçılığının onlarla əlaqəsi olmadığını dedi:

"Oyunun təşkilatçısı AFFA deyil. Avropa klubları arasındakı çempionatlarda, bu tipli liqa yarışlarında oyunun təşkilatçısı bizim tərəfdən çıxış edən yerli klub olur. Müvafiq olaraq, bu oyunun təşkilatçısı da "Qarabağ" klubudur. Ancaq istənilən halda bu məsələyə nəzarət etmək, demək olar ki, qeyri-mümkündür. Elə olmasa, digər ölkələrdə də bu məsələni həll etmiş olardılar. İşbazlar bilir ki, bu oyuna maraq yüksəkdir, ona görə əvvəlcədən biletləri alırlar. Biz olmayaq, "Qarabağ" olsun - fərq etməz, təəssüf ki, bu məsələ ilə bağlı nəzarət mexanizmi hələ ki yoxdur".