Futbol üzrə Azərbaycan Premyer Liqasının V turunda "Zirə" və "Neftçi" komandaları arasındakı oyun zamanı və sonra maraqlı anlar yaşanıb.

Axar.az xəbər verir ki, oyunun 45-ci dəqiqəsində baş hakim Rauf Cabbarov meydan sahiblərinin yeni baş məşqçisi Samir Abbasovla onun italiyalı rəqib həmkarı Roberto Bordini texniki zonadan kənarlaşdırıb.

Buna iki mütəxəssis arasında baş verən mübahisə səbəb olub.

Baş məşqçilər tribunaya qalxdıqdan sonra barışıblar. Öz aralarında qısa müzakirədən sonra onlar ilk yarının fasiləyədək olan kiçik hissəsini birgə izləyiblər.

“Neftçi”nin 2-1 hesabı ilə qalib ayrıldığı oyundan sonra isə “Zirə”nin futbolçularını aparan avtobus işə düşməyib. Bu səbəbdən də komandanın futbolçuları və texniki heyət üzvləri avtobusu itələməli olub. Bir qədər itələdikdən sonra avtobusun mühərrikini işə salmaq mümkün olub.

Hadisəni əks etdirən görüntülər sosial şəbəkələrdə yayılıb.