Oktyabrın 17-də 3 həftəlik fasilədən sonra Topaz Premyer Liqasında VIII tura start veriləcək.

Axar.az milli komandaların oyunları ilə əlaqədar çempionatda yaranmış fasiləyə son verildiyini xəbər verir. İlk oyun günü 2 matçın keçiriləcəyi tur Sumqayıtda başlayacaq.

Burada şəhərin eyni adlı komandası ilə "Neftçi" üz-üzə gələcək. Zirvə uğrunda mübarizə aparan "Gənclər şəhəri" təmsilçisi yenidən ilk pilləyə çıxa bilər. Bunun üçün Aqil Məmmədovun yetirmələri bakılıları mütləq məğlub etməlidirlər.

"Neftçi" isə ötən tur "Qarabağ" məğlubiyyətinin (1:3) əvəzini çıxıb, son iki qələbəsiz oyunlar seriyasına son qoymaq niyyətindədir. Günün ikinci oyunu turun mərkəzi qarşılaşması olacaq.

Belə ki, 11 xalla 3-cü pilləyə şərik olan "Qarabağ" doğma publika önündə "Qəbələ"ni qonaq edəcək. Paytaxtda münasibətlərinə aydınlıq gətirəcək komandaların duelində qalib gələn tərəf ilk pilləyə yüksələcək. Ardıcıl 3 turdur məğlubiyyətin nə olduğunu bilməyən son çempionlar növbəti qələbəsini ötən mövsüm ölkə kubokunda uduzduğu rəqibi üzərində qazanmalıdır.

o q h m t/f x
1 İnter 7 4 2 1 20-4 14
2 Sumqayıt 7 4 0 3 10-10 12
3 Qarabağ 6 3 2 1 9-6 11
4 Qəbələ 7 3 2 2 7-8 11
5 Neftçi 6 3 1 2 5-7 10
6 Simurq 7 3 0 4 9-8 9
7 Xəzər L 7 2 2 3 5-6 8
8 AZAL 6 2 2 2 5-8 8
9 Bakı 7 2 1 4 6-15 7
10 Araz N 6 1 0 5 5-7 3