Bu gün Azərbaycan üçün Avropa Liqası həyəcanı başlayır.

Axar.az xəbər verir ki, "Neftçi" I təsnifat mərhələsində ilk matçına çıxacaq. "Ağ-qaralar" bu gün öz meydanında Monteneqronun "Mladost" klubunu qəbul edəcək.

Rəqibi ilə müqayisədə avrokuboklarda böyük təcrübəyə malik "Neftçi" bu oyunun favoriti hesab olunur. Lakin Samir Əliyevin komandası bu görüşə ciddi itkilərlə çıxacaq.

Erik Ramos və Kaue da Silva cəza, Flavinyo isə zədə səbəbindən bu gün meydana çıxa bilməyəcək. Görüş saat 21:00-da başlayacaq.

Bu gün "Qəbələ" səfərdə "Dinamo"nun (Tiflis) qonağı olacaq. Ardıcıl ikinci dəfə avrokuboklara qatılan Qəbələ təmsilçisi ötənilki uğursuzluğu unutdurmağa çalışacaq. Bunun üçün "Qəbələ" Tiflisdən uğurlu nəticə ilə qayıtmağa çalışacaq.

Oyun Bakı vaxtı ilə saat 21:00-da başlayacaq. Klublarımızdan meydana ilk olaraq Bakı "İnter"i çıxacaq. Paytaxt təmsilçisi Albaniyada "Laçi"nin qonağı olacaq. Bu görüşün start fiti saat 20:30-da veriləcək. Maliyyə problemləri ilə üzləşən "İnter" bu cütün favoriti hesab olunur. Bu görüş "İnter"in baş məşqçisi Zaur Svanadzenin ilk avrokubok sınağı olacaq.