Komandamız güclüdü. Özümüzə inanırıq. Güclü baş məşqçimiz var. Roman Qriqorçuk rəqibləri yaxşı təhlil edir. Bütün azarkeşləri "Borussiya" ilə matçda komandamıza dəstək olmağa çağırıram.

Axar.az xəbər verir ki, bu sözləri "Qəbələ"nin və Azərbaycan yığmasının müdafiəçisi Ruslan Abışov deyib.

Futbolçu APA-ya geniş müsahibəsində bildirib ki, "Qəbələ"dən sensasiya gözləməyə dəyər.

Onun sözlərinə görə, "Borussiya"nın erməni hücumçusu Henrik Mxitaryana qarşı oynasaydı müəyyən epizodlarda aqressiv ola bilərdi:

"Amma çalışardım ki, sırf qaydalar çərçivəsində mübarizə aparım. Əgər meydanda üz-üzə gəlmək imkanı olsaydı, bəzi epizodlarda aqressiya göstərərdim. Amma 90 dəqiqə Mxitaryana qarşı eyni aqressiya ilə oynamaq da düzgün olmazdı. Bu, peşəkar idmançıya yaraşan hərəkət deyil".

Qeyd edək ki, "Qəbələ" - "Borussiya" matçı oktyabrın 22-si Bakıda keçiriləcək.