Döyüş meydanında PUA-ların sayının artması quru yolla logistikanı getdikcə daha da çətinləşdirir. Buna görə də növbəti mərhələ yeraltı müharibəyə keçid ola bilər.

Axar.az xəbər verir ki, bunu Ukraynanın 429-cu pilotsuz sistemlər briqadasının “Axilles” bölməsinin komandiri Yuri Fedorenko deyib.

O bildirib ki, döyüş meydanının “dronlar müharibəsi”nə çevrilməsi cəbhə xəttindəki bölmələrin təminatında ciddi problem yaradıb:

"Gələcək müharibənin əsasən göydə deyil, yer altında aparılacağı barədə fikri ilə razıyam. Bu döyüş əməliyyatlarının növbəti mərhələsini anlamaq baxımından mühümdür. Artıq yaxın zamanda mümkün olan yerlərdə yeraltı marşrutlar çəkməyi və tunellər inşa etməyi öyrənmək lazım gələcək. Bu, təmas xəttindəki bölmələrin təminatını həyata keçirməyə və eyni zamanda artilleriya, dronlar və digər zərərvurma vasitələrindən maksimum istifadə etməyə imkan verməlidir".