İran neft hasilatını məhdudlaşdırmayacaq, əksinə, hasilat həcmini sutkada 4 mln. barrelədək artırmaq niyyətindədir.

APA-nın verdiyi xəbərə görə, bu barədə Əlcəzairdə keçirilən beynəlxalq enerji forumunda İranın neft naziri Bijan Namdar Zəngənə bildirib.

"Biz OPEK-in məşvərət görüşündə saziş imzalamağa can atmırıq. İran neft hasilatını məhdudlaşdırmayacaq və hasilat həcmini sutkada 4 mln. barrelədək artırmaq niyyətindədir", - deyə nazir qeyd edib.

O qeyd edib ki, İran OPEK-də əvvəlki payını – üzv ölkələrin hasil etdiyi neftin ümumi həcminin 13 faizini qaytarmalıdır: "Bunun üçün İran sutkada 4,4 mln. barrel neft hasil etməlidir".

Bijan Namdar Zəngənə neft hasilatının kvotalaşdırılmasında əvvəlki sistemin – hər ölkə üçün müəyyən limitin təyin edilməsi (hazırda bütün təşkilat üçün ümumi hədd müəyyənləşdirilir - red.) sisteminin bərpa olunmasının vacibliyini qeyd edib.

Qeyd edək ki, İran iyun-iyul aylarında sutkada 3,8 mln. barrel neft hasil edib.