Gürcüstan aviadaşımalar sahəsində lider statusunu Türk Hava Yolları əldə edib.

Axar.az xəbər verir ki, 2017-ci ilin yanvarından sentyabrına qədər THY bazarın 11%-ni öz nəzarəti altına almağı bacarıb.

Gürcüstan bazarında ikinci ən böyük aviaşirkət “Georgian Eyrveys” şirkəti olub. Yerli gürcü şirkəti ilk 9 ayın nəticələrinə əsasən bazarın 10%-ni əlinə ala bilib. Qonşu ölkənin aviabazarındakı aktivliyə görə ilk beşliyi Macarıstanın “Viz Eyr” (8%), Ukraynanın “Fly UİA” (7%) və Birləşmiş Ərəb Əmirliklərinin “Flay Dubay” (6%) şirkətləri tamamlayıb.

Rusiya aviaşirkətləri də Gürcüstan bazarında mühüm paya sahib olublar. Belə ki “Aeroflot” bazarın 5%-nə, S7 və “Ural Eyəlayn” bazarın 4%-nə nəzarəti əlinə alıb. Türkiyənin “Peqasus”, Qətərin “Qətər Eyrveys”, İsrailin “İsrail Eyəlayns”, “Eyr Arabia” və İranın “Taban Eyr” aviaşirkətlərinin hər biri 3% olmaqla bazarda paya sahibdirlər.

Gürcüstanda ən az bazar payına “Lufthanza”, “Atlasqlobal”, AZAL, “Eyr Astana”, “Belavia”, “Yaneyr”, “Zaqros Eyəlayns” və LOT sahib olub. Onların bu bazarda payı 2%-dir.

Qeyd edək ki, Azərbaycan Gürcüstanda ən böyük investor sayılır.