Avronun manata nisbətən ucuzlaşması Avropanın vahid valyutasının məzənnəsinin dollara nisbətən dəyər itirməsi ilə bağlıdır.

Bu sözləri Axar.az-a açıqlamasında iqtisadçı alim Vüqar Bayramov deyib. Ekspert avronun dollara nisbətən qarşıdakı dönəmlərdə də ucuzlaşacağını bildirib:

“Bu ucuzlaşmanın davamlı olacağı gözlənilən idi. Çünki bir tərəfdən dünya bazarında dolların məzənnəsi möhkəmlənirdi, digər tərəfdən isə Avropa Mərkəzi Bankı uçot dərəcəsini dəyişmədi. Eləcə də Avropa Mərkəzi Bankı sentyabradək aylıq 30 milyard avroluq qiymətli kağızların alınması siyasətini davam etdirəcəyini açıqlamışdı. Nəticə etibarilə də avro getdikcə dünya bazarında dollara nisbətən ucuzlaşır. Praktik olaraq avronun indiki məzənnəsi 1 avro 1 dollar 17 sentdir və bu məzənnənin müəyyən qədər də azalması mümkündür. Avro dollara nisbətən ucuzlaşdıqca Avropanın vahid valyutasının manata nisbətən də ucuzlaşması müşahidə olunur”.

İqtisadçı buna baxmayaraq, avronun məzənnəsində kəskin ucuzlaşmanın gözlənilmədiyini bildirib:

“Çünki Avropa Mərkəzi Bankı avronun ucuzlaşmasına uyğun olaraq yenidən pul kredit siyasətinə baxa bilər. Eyni zamanda, yay aylarında məzənnələrdə nisbətən stabillik müşahidə olunur. Bu da təbii ki, turistlərin sayının artması və bu kontekstdə turizm və xidmət sektorundakı xərcləmələrin yüksəlməsi ilə bağlıdır. Hələlik dollar dünya bazarında möhkəmdir və digər valyutalar dollara nisbətən ucuzlaşdıqca manata nisbətən də ucuzlaşmaqda davam edəcək. Çünki manatın digər valyutalara nisbətən kursu çarpaz müəyyənləşir”.

Qeyd edək ki, bu gün avronun məzənnəsi 2017-ci il 18 dekabr tarixindən sonra ilk dəfə 2 manatdan aşağı düşərək, 1,9978 manat təşkil edib.