"Son zamanlar şou-biznes əhlinin yaxası açılır, paltarında problemlər olur".

Bu sözləri tanınmış professor, televiziya tənqidçisi Qulu Məhərrəmli Space TV-də yayımlanan "Əsl şou" verilişində aparıcı-müğənni Səidə Sultanın başına gələn "qəza" ilə bağlı Axar.az-a danışarkən deyib:

"Canlı yayımda səhvlərdən heç kim sığortalanmayıb. Təkcə Azərbaycanda deyil, bütün dünya televiziyalarında bu tip hallara rast gəlmək olur. Amma bunun qarşısını almağın bir yolu var ki, o verilişə yaxşı hazırlaşmaq, bütün nüansları əvvəlcədən götür-qoy etmək lazımdır.

Qəzaları iki yerə bölmək olar. Birincisi, texniki qəzalardır – bəzən gözlənilmədən nəsə sıradan çıxa bilər, yanğın ola, işıqlar sönə bilər və sairə. Bu tip qəzaların qarşısını almaq müəyyən qədər çətindir. Yaradıcılıq baxımından da gözlənilməyən şeylər ortaya çıxa bilir. Amma bunlar bəzən düşünülmüş şəkildə edilir.

Bu, bir az mürəkkəb məsələdir. Son zamanlar şou-biznes əhlinin yaxası açılır, paltarında problemlər olur. Bunlar bir az fenomenal şeylərdir: bilmək olmur əvvəlcədən düşünülüb, yoxsa doğrudan da bu şəkildə qəza yaranıb.

Bir neçə il öncə qadın basketbolunda məşhur idmançılardan biri topu səbətdən keçirəndən sonra üst paltarını çıxarıb büsqalterlə qalmışdı. Hər kəs bunu qələbə sevinci ilə əlaqələndirsə də, bir müddət sonra məlum oldu ki, basketbolçu xanım əynindəki büsqalter şirkəti ilə müqavilə imzalayıb və bu hərəkəti ilə şirkəti reklam edib. Bu səbəbdən belə şeylərin mümkün olduğu faktı qaçılmazdır".

Xatırladaq ki, iki gün əvvəl "Əsl şou" verilişində müğənni Səidə Sultanın yaxasının açılması ilə sinəsinin görünməsi mətbuatda və sosial şəbəkələrdə geniş müzakirələrə səbəb olub.