Budəfəki müsahibimiz modelyer-rəssam Təranə Sultanovadır. O, moda sahəsində kifayət qədər ciddi layihələrə imza atıb, ölkəmizi mötəbər müsabiqələrdə təmsil edib.

Axar.az Təranə Sultanova ilə söhbəti təqdim edir:

- Təranə xanım, yorğun görünürsünüz. Mən elə bilirdim, ən rahat peşə modelyerlikdir. Elə geyinib-kecinənlərə baxır, bir qədər dəyişiklik edir, zəhmət haqqını alırsınız, vəssalam!

- Yox, qətiyyən (gülür). Nə danışırsınız? Elə ən çətin peşə bəlkə də bizdədir! Əvvəlcə onu qeyd edim ki, geyimlərin hazırlanması üçün lazım olan hər şey bizdə var. Materiala əsasən eskiz çəkir, onu müştərinin zövqünə uyğun hazırlamağa çalışırıq. Hamısı o qədər vaxt və zəhmət tələb edir ki! Hələ mən sonradan xanımın və ya bəyin bizim zövqümüzə seçilən geyim və aksessuarlarda dəyişiklik etmək istəyini dilə gətirmirəm.

- Yəni o cür hallar tez-tez baş verir?

- İş ondadır ki, Azərbaycanda modelyer və dizaynerlərə üslub seçimi ilə bağlı müraciət edənlərin əksəriyyəti xanımlardır. Kişilər daha çox öz zövqlərinə güvənirlər. Xanımlar isə daha kaprizli və ərköyün olurlar.

Ziyafət və ya iş görüşmələrində...

- Sizcə, kişilərin modelyerlərdən uzaq gəzmələri nə ilə bağlıdır?

- Məncə, daha çox burada milli-mənəvi hesab edilən daxili tərbiyədir. Təbii ki, uşaq yaşlarından "kişi nə geyindi, yaraşar" prinsipi ilə böyüyən gənclər öz ciddi çərçivələrindən kənara çıxmaqda çətinlik çəkir. Nəticədə, lazım olan ziyafət və ya iş görüşmələrində özlərinə və şəraitə münasib geyim seçirlər.

- Necə etmək olar ki, ölkəmizdəki kişilər əksər xanımlar kimi zövqlə geyinsin?

- (Gülür) Bu, artıq onların stereotipinə çevrilib. Amma zövqlə geyinən güclü nəslin nümayəndələri də az deyil. Modelyerlərə daha çox sənət adamları müraciət edir. Əgər siz efirdə zövqlə geyinmiş, paltarlarında rəng seçiminin biri digərini tamamlayan kişi müğənni və ya digər sənət sahibi görürsünüzsə, bilin ki, sözügedən şəxsin olduqca güclü modelyeri var. Ümumiyyətlə isə zövq dünyası insanın təbiətindən asılıdır və burada mühitlə maddiyyat böyük önəm daşıyır.

- Təranə xanım, dizaynerlərdən danışdıq. İstərdim moda və dizayn aləmindəki uğurlarınızdan söhbət açasınız.

- Mənim 27 yaşım var. Rəssamlıq Akademiyasının magistratura pilləsində təhsilimi davam etdirirəm. 2012-ci ildə "Nez Faşion" modalar evinin təşkil etdiyi "2012-ci ilin paltarı moda müsabiqəsində" laureat oldum.

2012-ci ildə "Faşion moda" İdman və Gənclər Nazirliyi tərəfindən təşkil edilən "Art faşion" moda müsabiqəsinin "ən yaxşı geyim kolleksiyası" nominasiyası üzrə qalib oldum.

2011-ci ildə MDB ölkələrinin iştirak etdiyi "Gənc modelyerlər arasında keçirilən moda festivalında" ölkəmizi təmsil etmişəm (Festival İdman və Gənclər Nazirliyi tərəfindən ölkəmizdə təşkil olunmuşdu). Bütün sadaladığım nailiyyətlərimdə mükafatla təltif edilmişəm.

Hazırda "Çaqteks" modalar evində modelyer olaraq çalışıram və mediaya modalar evi adından çıxışlar etdiyim üçün, sözügedən mərkəzin simasına çevrilmişəm.

Ailəyə meyilli deyiləm...

- Gənc olmağınıza baxmayaraq, böyük işlərə imza atmısınız. Xaricdən təklif gələrsə, başqa bir ölkəyə köçərək, orada yaşamağa və çalışmağa razılıq verərdinizmi?

- Yəqin ki, hə. Amma yenə də ailəmlə məsləhətləşərdim. Ailədə üç övladıq. Ortancıl və ən ərköyün övlad mənəm. Ailə qurmağa meyilli insan deyiləm. Mənim üçün əsas olan karyeradır. Düşünürəm ki, xanım öz üzərində daha çox çalışmalıdır, cəmiyyətdə heç kəsdən asılı vəziyyətdə qalmamalıdır.

- "Ailə qurmağa meyilli deyiləm", - dediniz və xarici ölkə ilə bağlı təklifə razılıq bildirdiniz. Bəs, xarici vətəndaşla nikaha necə baxırsınız?

- Əla. Mən düşünürəm ki, kifayət qədər təhsilli və tərbiyəli xanımlar elə daha çox əcnəbi vətəndaşlarla ailə qururlar və çox doğru addım atırlar.

- Bəs, bizim kişilər...

- Siz indiki cavanlara baxın! Onlar ancaq despot xislətlidirlər: qadın evdə olsun, mətbəxdə, danışmasın, fikrini söyləməyə belə imkan vermirlər. Azad fikirli insan heç vaxt qul, kölə ola bilməz: hətta sevgi olsa belə, gec-tez bu əsarət bitməlidir. Mənə görə sevgi yoxdur, hörmət var. Amma bizim gənclər yaxşı qızlarımızın qədrini bilmir, onlara sıxıntı verir. Bizdən fərqli olaraq, Avropa hesabat aparmır.

- Yəni Qafqaz ətəyinin sakinlərinin bir qədər emosional və kobud olması sizdə onlara qarşı antipatiya yaradır?

- Açığı, çox vaxt – hə. Təbii ki, evlilik təklifləri ilə də qarşılaşıram, sevgi etirafları ilə də. Lakin bu hallarda belə, özümü əsarətdə olan insan kimi hiss edirəm: qarşı tərəfdə səmimiyyət sezilmir. Əksinə, ancaq hakim olmaq, hökmranlıq etmə hissini duyuram. Düşünürəm ki, qadın zəif deyil, zərif olmalıdır. Bununla belə, gücünü, qabiliyyət və savadını büruzə verməlidir.

İspaniyada ofisiant işləyərəm...

- Hansı xarici ölkəyə getmək istərdiniz?

- İspaniyaya. İnanın, ən böyük arzumdur! Hazırda ispan dilini də məhz bu arzuma görə öyrənirəm. Onu da qeyd edim ki, İspaniya ruhumun, daxilimdəki Təranənin vətənidir.

- İspaniyada da modelyer olaraq çalışacaqsınız?

- Gedən kimi öz peşəm üzrə mənə çalışmaq çətin olacaq. İspaniyaya olan böyük məhəbbətimdən, orada qalıb yaşamaq üçün elə ofisiant olaraq da çalışmağa hazıram.

- İspan dilini öyrəndiyinizi dediniz. Başqa hansı xarici dilləri bilirsiniz?

- Rus, ingilis, türk dillərini bilirəm, ispan dilini müstəqil olaraq öyrənirəm, bir qədər də tat, kürd və erməni dillərini bilirəm.

Bu, bizim üstünlüyümüzdür

- Erməni dilini haradan öyrənmisiniz?

- Nənəm bilirdi o dili, mənə də öyrədib. O vaxtlar Bakıda erməni çox olduğundan nənəm bu dildə sərbəst danışa bilirdi. Fikrimcə, biz düşmənimizin dilini də bilməliyik. Bu, bizim üstünlüyümüzdür.

- Qayıdaq geyim tərzinə. Təranə xanım, geyimləri seçmək və uyğunlaşdırmaq çox vacibdir?

- Geyim, əslində, insanı təqdim edir. Əlbəttə, bu baxımdan tərz, seçim və üslub əsas götürülür. Misal üçün, biz heç vaxt ziyafətə idman üslubunda gedə bilmərik. Bu artıq özümüzə və qarşımızdakılara diqqətsizlik kimi qəbul ediləcək.

- Bir çox insan geyimə önəm vermir. Düşünmürsünüz ki, onların uğursuz geyim seçimi işlərində problem yaradır?

- İnanın, əgər geyimlərinə diqqət etmirlərsə, çox güman ki, bu, onların olduqca məşğul olmaqlarından xəbər verir. Hər halda istənilən uğur geyimə deyil, məhz zəhmətə bağlıdır. Götürək lap qədim dövrü: insan yaranışdan paltarsız olub. Kişilərin tarixi geyimləri öncə ətək olub, daha sonra don. Müasir kişi özünə don və ya ətək geyməyi təhqir hesab edər. Amma vaxtilə bu bizim ənənəvi geyimimiz olub. Zaman keçdikcə insan daha çox rahatlığa üstünlük verib və geyimdə belə inqilab başlanıb.

Müasirliyi geyimlə ölçmürəm...

- Özünüz hansı geyim tərzini bəyənirsiniz və hansı rəngə daha çox üstünlük verirsiniz?

- Mən kombinezonu çox sevirəm və sevdiyim rənglər qırmızı, qara, ağ, qızılı, qəhvəyidir. Bej tonlardan istifadə edirəm.

- Bu ilin gəlinlikləri hansı dəbdə olacaq? Bir qədər geyim və rənglərdən də bəhs edərdiniz.

- Gəlinliklərin rəng seçimində dəyişikliklər ola bilər. Belə ki, bu il gəlinliklərin rəngi ağ idisə, növbəti il getdikcə tünd rənglər dəbdə olacaq. Elə Saabın kolleksiyasına baxsaq, bu yeniliyi görə bilərik.

Bu ilin ziyafət geyimlərində isə balıq formalı paltarlar dəbdədir . Belə olduğu halda, güpürlü paltarlar, astar hissəsi bədən rəngində və bu ton üzərində güprün naxışlarının daha aydın görünməsindən ibarət olacaq. Bu il "toxunmalı" paltarlar dəbdədir: bu toxunmalarda güllərin rəsmi əks olunur və toxunma ilə paltarın arasında kontrastlıq gözlənilməlidir. Məsələn, "Dolçe Qabbana"nın kolleksiyasında qara rəngli paltarda iri, qırmızı qızılgül toxunması olduğu kimi. Dəb gözəllikdir, lakin aşırı gözəllik dəbi nüfuzdan sala bilər. Gözəlliyə dəb və sadəliklə qatılan xanımları alqışlayıram.