İş adamı Şərurlu İsfəndiyarın bir neçə gündür “gündəm yaradan” açıqlamasına ötən gün daha biri əlavə edilib. Adam deyir ki, imkanı olsa, məscidləri söküb, yerində məktəb inşa edər!

Qəribə məntiqdir: məktəb tikmək üçün niyə məscid sökülməlidir ki! Ümumiyyətlə, bu nə təfəkkürdür ki, nəyisə tikmək üçün mütləq bir şeyi gərək yıxıb-dağıdasan, sökəsən, atasan?

İllah ki məktəb tikməyə meylin var – ki inanan daşa dönsün – boş torpaq al, geniş, gözəl bir məktəb tik, böyük bir rəhmət qazan!

Ancaq burda “normal məntiqlə” yanaşıb, sosial şəbəkələrdə Şərurlu İsfəndiyarın üstünə gələnlərə mütləq bir “əks-arqument” xatırlatmaq vacibdir.

Əzizlər, bu hörmətli iş adamımız, doğmamız “gözünü açandan” – yəni iş həyatına başlayandan tikmək üçün nəyisə söküb, dağıdıb: məsələn, ağacları, yaşıllıqları, piyada səkilərini, həyətləri, maşın yollarını...

“Şərur” MTK-nın bir-birinin içində, həyətsiz tikilən binalarında “həyət” adına nəsə varmı?

İndiyə qədər Şərurlu İsfəndiyar onlarla, bəlkə, yüzlərlə bina tikib – bir binasının həyətində uşaq bağçası, yaxud uşaqların oynaması üçün meydança, sakinlərin sağlamlığı naminə “yaşıl həyət” cəhənnəm, lap belə “qara”, “ağ” həyət saxladığını görən olubmu?

Bakıda məktəblər yüklənir, 2-3 növbədə çalışmağa məcbur olur, şagird sıxlığı pik həddə çatır: məktəblərin yanındakı ərazilərdə yeni korpuslara ehtiyac var. Ancaq biz nə görürük?

Məktəblərin həyətləri MTK-lar tərəfindən zəbt edilir, məktəb hasarlarının düz dibində balkonları məktəb binasının hasarının üstündən bir neçə metr içəri girən yaşayış binaları ucaldılır, faktiki olaraq məktəblər daş binalarla mühasirəyə alınıb.

Məktəblərin tikinti qaydaları vardı: işıqlı olmasına diqqət edilərdi, məktəb otaqlarına və həyətinə günəş şüasının düşməsinə xüsusi fikir verilərdi, havalı olmalıydı, şagirdlərin göz yorğunluğunu aradan qaldırması üçün pəncərəsi önündə açıqlıq nəzərə alınardı.

Bakıda bu cür məktəblər qalıbmı?

Yeni, açıq ərazidə, geniş alanda tikilən məktəblər belə cəmi 2-3 ildən sonra göydələnlərlə elə əhatələnir ki, məktəbə işıq düşmür.

Şərurlu İsfəndiyarın məntiqini daş-qalaq etməyin: Bakıda artıq bina tikməyə yer yoxdur – yaşıllıq bitib, yollar, səkilər, həyətlər zəbt olunub, indi inanc yerlərinə, dəyərlərə keçmək vaxtıdır.

Məscidləri söküb, yerində binalar ucaltmaq lazımdır. Əminəm ki, tikinti maqnatlarımız Bakıda son vaxtlar ucaldılan və geniş əraziyə malik bir neçə məscidə yana-yana baxırlar ki, bu qədər ərazi “zay” olub – halbuki orda 50 bina tikib, milyardlar qazanmaq olardı...

Bakıda məscidləri söküb, yerində binalar tikəndən sonra keçərik pirlərə, ocaqlara, ibadət yerlərinə.

Onsuz da bir çoxları üçün dəyər qalmayıb – guya ocaq qalsa nə olacaq ki? İmana gələcəklər?

Yeri gəlmişkən, rəhmətlik Füzuli deyirdi ki:

Hər kimin zatında var isə şərarət küfrü,

İslahati-ülum ilə müsəlman olmaz!

İçində şeytan oturanlar üçün nə məscid, nə məktəb...