İngiltərədə gözəllik yarışmasına hicabda qatılan model Model Sara İftekhar finala qədər yüksəlib.

Publika.az xəbər verir ki, İngiltərədə Haddersfild Universitetinin hüquq fakültəsində təhsil alan 20 yaşlı Sara "İngiltərə gözəli" (“Miss England”) gözəllik müsabiqəsində iştirak edib. O, müsabiqəyə hicabda qatılmasına baxmayaraq, finala qədər yüksələ bilib. Müsabiqənin qalibi isə gələn həftə seçiləcək.

Sara İnstaqramda bildirib ki, müsabiqədə heç vaxt unudulmayacaq bir təcrübə qazanıb:

“Burada finala qədər yüksələcəyimi düşünməzdim. Hər kəs necə görünməsindən asılı olmayaraq, özünə görə gözəldir. Çəki, boy, irq, dəri rəngi və s. amillər əhəmiyyətsizdir”.

Müsabiqə eyni zamanda Cənubi Amerikada, Şri-Lankada və Rusiyadakı yardıma ehtiyacı olan uşaqlara dəstək məqsədilə keçirilir. Sara da bu quruma dəstək olur və fond toplanmasına yardım edir.

Qeyd edək ki, Sara “Miss England” titulunu əldə edərsə, Çinin Sona şəhərinə gedib İngiltərəni "Dünya gözəli" ("Miss World") yarışmasında təmsil edəcək.