Atamın dünyasını dəyişməsi mənə çox təsir etdi.

Bu sözləri tanınmış prodüser Təranə Səmədova nə üçün prodüserlik işini seçməsi haqda Axar.az-a danışarkən deyib. O, atasının onu başqa ixtisasda görməyi arzu etdiyini bildirib:

"Atamın arzusu məni hüquqşünas görməkdi. Bu mənim üçün bir qədər yaralı mövzudur. Atam dünyasını tez dəyişdi, anamla tək qaldım. Anam məni tək böyütdüyü üçün düşündü ki, birdən məni hüquqda oxutdura bilməz. Elə oldu ki, Maliyyə İqtisad Kollecinin Maliyyə və vergi hüququ fakültəsinə qəbul olundum. Anam da dedi ki, elə hüquq adı var burada və beləcə bu ixtisası seçdim. Amma hərdən bu sahədə müəyyən haqsızlıqlarla, çirkin söhbətlərlə üzləşəndə düşünürəm ki, təki elə gedib iqtisadçı olardım. Heç kəs məni tanımazdı. Bostanıma bu qədər daş atan olmaz, beynim də yorulmazdı. Amma düşünürəm ki, qismət belə imiş. Bəlkə də o işlə məşğul olsam, mənə bu birindən adi gələcəkdi".