Vergilər Nazirliyinin vergi borcu olan tanınmış müğənnilərin adını açıqlaması birmənalı qarşılanmayıb.

Axar.az xəbər verir ki, bəzi şou-biznes nümayəndələri nazirliyin yaydığı siyahı ilə razı deyil. Xalq artisti Gülyanaq Məmmədova və əməkdar artist Elza Seyidcahan ANS-ə deyib ki, borcları ödəmək fikirləri yoxdur.

G.Məmmədovanın sözlərinə görə, dövlət işində işlədiyi üçün hər ay maaşından vergi tutulur: "Əlavə olaraq, hərdən toylara gedəndə vergi ödəyirəm. 2008-ci ildən 2011-ə qədər vergi ödəmişəm. Daha sonra isə ödənişi dayandırmışam. Yenidən belə qərar çıxandan sonra oktyabr ayından VÖEN açdırmışam və qanuni şəkildə vergi ödəyirəm. Birdən-birə mənə bildiriş gəlir ki, sizin 5 min 200 manat vergi borcunuz var".

İfaçı deyib ki, bu qədər borcunun necə yarandığını izah etməyiblər. "Mən soruşanda ki, bu borc hardan çıxdı, mənə cavab verirlər ki, hesablayıb elə yazmışıq. Mən onu necə ödəyim? Mən 3 körpəmim ehtiyaclarını ödəmək üçün toylara gedirəm, ərimin də şirkəti yoxdur, maaşa işləyən adamdır. Ehtiyacım olmasa, heç toylara getmərəm, özümü ucuzlaşdırmaram. Heç olmasa, əlçatmaz olaram".

Xalq artisti deyir ki, əgər vergi borcu ödəməsə, onu həbs edə bilərlər və yaxud ölkədən çıxışı qadağan oluna bilər.

Əməkdar artist Elza Seyidcahan isə deyir ki, adı siyahıya ola bilsin səhvən düşüb. Çünki vergi borclarını vaxtında ödəyir. "Nazirlikdə elə bilirlər ki, biz hara gediriksə, orada da pul qazanırıq. Mən əgər pul qazanmıramsa, necə vergi ödəyə bilərəm. Getdiyim yerdən qonorar alım ki, vergi borcu ödəyim. Biz hətta toya gedəndə pul yazdırırıq. Hazırda araşdıracağıq, əgər toya gedib qonorar almışamsa, o zaman vergi ödəyəcəm".

Qeyd edək ki, ötən gün Vergilər Nazirliyi rəsmi saytında vergo borcu olan müğənilərin siyahısını verib. Onların arasında Brilyant Dadaşova, Emil Bədəlov, Mətanət İsgəndərli, Elza Seyidcahan, Gülyanaq Məmmədova, Rəqsanə və s. kimi tanınmışların da adı yer alır.