Ana səhifə Kult Musiqi |
Niderlandda dünya şöhrətli sənətkar Rəşid Behbudova həsr olunmuş poçt markası dövriyyəyə buraxılıb.
Axar.az xəbər verir ki, bu barədə R.Behbudovun qızı Rəşidə Rəşid məlumat yayıb.
O bildirib ki, marka 2004-cü ildən Niderlandda yaşayan, fəal diaspor nümayəndələrindən olan həmyerlimiz Səltənət Rəvanqızının müəllifi və sponsoru olduğu "Azərbaycan inciləri" layihəsi çərçivəsində buraxılıb:
“Niderland qanunlarına əsasən, vətəndaşlar dövlət səviyyəsində poçt markalarının buraxılmasını sifariş edə bilərlər. Bunun üçün markanın məzmunu haqqında lazım olan dövlət orqanlarına məlumat verilir və bu məlumatlar yoxlanıldıqdan sonra markanın çapına icazə verilir.
"Azərbaycan inciləri" çərçıvəsində buraxılan markalar artiq PostNL sistemində geniş istifadə olunur və hətta ABŞ, İsrail, Azərbaycan və digər ölkə poçtlarında da tətbiq olunur”.
Qeyd edək ki, Səltənət Rəvanqızı Bakıda doğulub. Uşaq yaşlarından rəqslə məşqul olub. Məşhur “Cücələrim” və “Çinar” ansambllarında çıxış edib. Bakı Xoreoqrafiya Məktəbində xalq artisti, əfsanəvi rəqqasə və xoreoqraf Əminə Dilbazının sinifində təhsil alıb. 1992-ci ildə Azərbaycan İncəsənət İnstitutunun aktyorluq fakültəsini fərqlənmə ilə bitirib.
O, 2004-cü ildə peşəkar futbolçu ilə ailə quraraq Niderlanda köcüb.
Niderlandda Azərbaycan diaspor təşkilatının fəaliyyətində aktiv iştrak edən Səltənət Rəvanqızı eyni zamanda rəqs müəllimi kimi fəaliyyət göstərir.
Tarix
2021.09.23 / 01:35
|
Müəllif
Axar.az
|