VIII “Muğam” müsabiqəsinə sənəd qəbulu artıq başa çatıb.

Bu barədə Kult.az-a AzTV-nin Sosial media və ictimaiyyətlə əlaqələr şöbəsinin rəisi Nərgiz Rəfiyeva məlumat verib.

Onun sözlərinə görə, Azərbaycanın bütün regionlarını əhatə etməklə müsabiqədə iştirak etmək üçün müraciət edən 300-dən çox şəxsin sənədləri qəbul edilib.

Sənədlər regional mərkəz olaraq Xaçmaz, Sabirabad, Lənkəran, Naxçıvan, Bərdə, Gəncə, İsmayıllı, Şəki və Bakıda qəbul olunub. İran İslam Respublikasından da müsabiqədə iştirak etmək istəyənlər sənədlərini təqdim ediblər.

Yarışmanın builki münsif heyətinə korifey sənətkar Arif Babayev, xalq artistləri Səkinə İsmayılova, Mələkxanım Əyyubova, Sərdar Fərəcov, Nəzakət Teymurova, Mənsum İbrahimov, Teyyub Aslanov, əməkdar artist Fərqanə Qasımova və əməkdar mədəniyyət işçisi İlqar Fəhmi daxildir.

Birinci seçim turu aprelin 2-dən regionlarda başlayacaq. 21-22 aprel tarixlərində isə Beynəlxalq Muğam Mərkəzində müsabiqənin Bakı üzrə birinci seçim turu, 23-24 apreldə 2-ci seçim turu baş tutacaq və münsiflər heyəti tərəfindən iki turun yekununa görə ən yüksək bal toplamış 20 nəfər final mərhələsinə iştirak hüququ qazanacaq.

Final mərhələsi mayın 10-dan etibarən həftənin 2-ci və 4-cü günləri Azərbaycan Televiziyası ilə canlı yayımlanacaq.