Aylarla davam edən cəhdlərdən sonra irəliləyiş əldə edilmədi, indi Ukraynada müharibənin başa çatdırılması ilə bağlı danışıqlarda artıq abstrakt çərçivələrdən söhbət getmir. Söhbət konkret kompromislərdən gedir.

Axar.az xəbər verir ki, bunu Ukraynanın sabiq xarici işlər naziri Dmitri Kuleba bildirib.

“Nəhayət müəyyən aydınlıq yaranır, lakin hələ eyforiya üçün vaxt deyil. Deyilir ki, yalnız ərazi məsələləri həll olunmamış qalır, amma Ukraynanın qırmızı xətləri xəritələrdə qeyd olunmur. Acı tarix öyrədib ki, əsas məsələ atəşkəs xətlərinin haradan keçməsi deyil, ondan sonra nə baş verəcəyidir”, – deyə diplomat vurğulayıb.

O qeyd edir ki, əgər ABŞ həqiqətən də Ukraynaya hüquqi cəhətdən məcburi təhlükəsizlik zəmanətləri təklif etməyə hazırdırsa, bu halda Prezident Vladimir Zelenski böyük bir qələbə qazanmış olacaq:

“Bu, Kiyevin 1991-ci ildə Moskvadan müstəqillik qazandığı vaxtdan bəri can atdığı və Qərb tərəfdaşlarının isə davamlı olaraq verməkdən imtina etdiyi bir məsələdir”.