Demokratlar Partiyasından ABŞ prezidentliyinə namizəd olan Hillari Klinton Pentaqonun nüvə silahlarının modernizasiyası planına qarşı çıxıb.

Axar.az xəbər verir ki, bu barədə informasiyanı ABŞ-ın "Hill" qəzeti yayıb. Qəzet Klintonun seçki qəragahının üzvlərindən birinin elektron məktubları xakerlər tərəfindən oğurlandıqdan sonra burada keçmiş dövlət katibinə aid səs yazısı aşkar edildiyini bildirib. Bu səs yazısında Klinton Pentaqon və Obamanın nüvə arsenalı ilə bağlı planını tənqid edib:

"Bizə ən sonuncu lazım olan şey nüvə başlıqları ilə təchiz olunmuş yüksək dəqiqliyə malik qanadlı raketlərdir. Ölkə üçün bundan qorxulu ssenari ola bilməz. ABŞ bunun qarşısını almaq üçün hər şeyi etməlidir".

Qeyd edək ki, ABŞ bir müddət öncə nüvə arsenalının modernləşdirilməsi haqqında qərar qəbul edib. Qərara əsasən, ABŞ nüvə arsenalını yeniləmək üçün 20 il ərzində 450 milyard dollar pul xərcləyəcək.