Daha öncə hücuma məruz qalmış Türkiyəyə məxsus "MV Reyhan Sari" quru yük gəmisinin sahibləri Ukraynaya qarşı Beynəlxalq Cinayət Məhkəməsinə iddia ilə müraciət etmək qərarına gəliblər.

Axar.az xəbər verir ki, bu barədə "HaberDenizde.com" məlumat yayıb.

"İnsident iyulun sonunda baş verib. Rusiyanın Taman limanından Trabzon şəhərinə kömür daşıyan Türkiyəyə məxsus "MV Reyhan Sari" quru yük gəmisi Novorossisk sahilləri yaxınlığında dron hücumuna məruz qalıb. Hadisə qurbansız ötüşməyib. Hazırda quru yük gəmisinin sahibi olan Türkiyənin "T ve O Denizcilik" şirkəti, eləcə də ekipajın 15 üzvü baş vermiş hadisə ilə bağlı Haaqadakı məhkəməyə iddia ərizəsi verməyə hazırlaşır. Müraciətdə qeyd olunur ki, beynəlxalq hüququn normalarına əsasən mülki ticarət gəmiləri qorunan obyektlər hesab edilir və onlara qarşı hücum yolverilməzdir. Beynəlxalq instansiyada iddiaçıların hüquqi təmsilçiliyini "Memişoğlu Kurun" hüquq şirkəti həyata keçirəcək",- məlumatda deyilib.

Qeyd edək ki, Türkiyə quru yük gəmisinə PUA hücumu nəticəsində ekipaj üzvlərindən biri həyatını itirmiş, daha üç nəfər xəsarət almışdı. Hücum zamanı gəminin özünə də ciddi maddi ziyan dəymişdi.