Latviya Prezidenti Edqars Rinkeviçs NATO qırıcılarının ölkə ərazisində pilotsuz uçuş aparatını vurmasından sonra məzuniyyətini yarımçıq dayandırıb.

Axar.az Globalinfo.az-a istinadən xəbər verir ki, məlumata görə, dövlət başçısının avqustun 15-də vəzifəyə başladığı vaxtdan ilk dəfə xalqa müraciət etməsi planlaşdırılır.

Xatırladaq ki, avqustun 14-də səhər saatlarında Baltikyanı ölkələrin hava məkanının patrulunu həyata keçirən NATO missiyasının qırıcıları pilotsuz uçuş aparatını vurub. PUA meşəlik ərazidə məhv edilib, hadisə nəticəsində heç kim xəsarət almayıb.

Latviya hərbçiləri vurulan PUA-nın xarici mənşəli olduğunu bildirir və onun Rusiya hava hücumundan müdafiə sistemlərinin radioelektron maneələri səbəbindən Latviya hava məkanına daxil ola biləcəyini ehtimal edirlər. Hərbçilər daha əvvəl Rusiya-Ukrayna müharibəsi davam etdiyi müddətdə bu cür insidentlərin baş verə biləcəyini açıqlayıblar.

PUA-lar daha əvvəl də bir neçə dəfə Latviya hava məkanına daxil olub. Mayın əvvəlində pilotsuz uçuş aparatı Rezekne şəhərində neft bazasının ərazisinə düşüb. Həmin vaxt rezervuarlar boş olub.

İyunda isə Fransa Hərbi Hava Qüvvələrinə məxsus NATO qırıcıları Rezekne və Karsava şəhərləri arasında PUA-nı vurub. Hazırda onun qalıqlarının axtarışı davam edir.