Türkiyənin Başikada varlığı qanunsuz deyil. Nə qədər ki, Başikada bizə ehtiyac var, oradan çıxmayacağıq.

Axar.az xəbər verir ki, bu sözləri Türkiyə Baş nazirinin köməkçisi Numan Qurtulmuş Başika hərbi düşərgəsinə görə İraqla aralarında yaranan gərginliklə bağlı deyib.

"Beynəlxalq ictimaiyyət və İraq hökuməti İŞİD-lə həqiqətən də mübarizə aparırsa, hazırda ən mühüm məsələ Mosulun xilası olmalıdır. Türkiyə də məhz Mosula, bu şəhərin əhalisinə dəstək vermək üçün oradadır. İraqın baş naziri başqalarının təsiri altında qalıb, ona görə də siyasətdən danışa bilmir. Əgər siz oraya başqa bir terror qruplaşmasını çağırsanız, İraqda sülhə nail olmaq mümkünsüz hal alacaq. Eyni zamanda, Mosul problemi də həllini tapmayacaq. Məzhəb savaşının nə sünnilərə, nə də şiələrə faydası var. İmperializm hədəfləri olan ölkələr Orta Şərqdə məzhəb savaşı başladıb, buranı parçalamağa çalışır", - deyə baş nazirin köməkçisi çıxışında bildirib.

Qeyd edək ki, İraqın Baş naziri Heydər Abadi Başika böhranına münasibət bildirərkən, Türkiyənin bölgədə ərazi iddialarına əl atacağından ehtiyat etdiyini deyib.