Səudiyyə Ərəbistanı İraqla münasibətlərini bərpa etdikdən sonra İranla təmas qurmaq niyyətindədir.

Axar.az xəbər verir ki, bu sözləri Səudiyyə Ərəbistanının Xarici İşlər naziri Adil Cübeyrin İraqa səfərini şərh edərkən beynəlxalq hüquq mütəxəssisi Əli əl-Tamimi söyləyib.

Tamimi İraq-Səudiyyə Ərəbistanı parlamentlərarası əlaqələrin uzun illər sonra ilk dəfə müsbət yöndə inkişaf etdiyini, ötən əsrin 90-cı illərindən sonra iki ölkə arasında əlaqələrdə durğunluq yaşandığını da qeyd edib.

İki ölkənin güclərini terrorizm ilə mübarizədə birləşdirmək istədiklərini deyən Tamimi İraqın terrorizmlə savaşdığını, qonşusu Səudiyyə Ərəbistanının həm kəşfiyyat baxımından, həm də ölkənin yenidən abadlığı, şəhərlərin normal axına düşməsi baxımından Bağdada böyük dəstək verəcəyini vurğulayıb.

Tamimi S.Ərəbistanının İraqdan sonra da Tehranla təmas qurmağı hədəflədiyini bildirib.

Qeyd edək ki, Cübeyr ABŞ-ın 2003-cü ildə İraqı işğalından sonra bu ölkəyə səfər edən ilk Səudiyyə rəsmidir.