İspaniya Kataloniyanın bütün maliyyə qaynaqlarını nəzarət altına alıb.

Axar.az xəbər verir ki, bu barədə informasiyanı “Blomberq” agentliyi yayıb. Agentlik İspaniyanın bu addımı Kataloniyanın müstəqillik referandumu keçirməsinin qarşısını almaq üçün atdığını bildirib. İlk dəfə olaraq Kataloniya müxtariyyətinin yerli büdcəsinə müdaxilə edən rəsmi Madrid verdiyi qərarla Kataloniyadakı təhsil, səhiyyə, sosial xidmətlər və məmur maaşları kimi bütün fundamental dövlət xərclərinin bundan sonra birbaşa ölkənin mərkəzi büdcəsi tərəfindən qarşılanacağını vurğulayıb.

Kataloniya Muxtariyyəti hökuməti sədrinin müavini və İqtisadiyyat naziri Oriol Yunkeras isə jurnalistlərə açıqlamasında İspaniyanın bu addımının doğru olmadığını söyləyib:

"Hökumətin bu addımı muxtar respublika üçün təyin olunan büdcə sabitliyini riskə atır. Nəticənin necə olacağını bilmirik, İspaniya hökumətinin də bildiyini zənn etmirəm. Çünki bu hal ilk dəfədir baş verir. Onlar bilməlidir ki, bu tip cəhdlər referendumun keçirilməsinə heç cür mane ola bilməz”.