Ukraynanın Belqraddakı səfiri Aleksandr Aleksandroviç Serbiya ilə Rusiya arasındakı əlaqələri pozmağa çalışır.

Axar.az xəbər verir ki, bunu Serbiya Xarici İşlər Nazirliyinin dövlət katibi İviça Tonçev jurnalistlərə açıqlamasında söyləyib.

"Mən Ukrayna Xarici İşlər Nazirliyinə və Ukrayna hökumətinə Aleksandroviçə bu cür davranışın yolverilməz olduğunu bildirmək üçün müraciət etmək istərdim. O, müsahibələrinin birində Belqradı Makedoniyada qeyri-stabillikdə, Monteneqroda dövlət çevrilişi təşkil etməkdə, Bosniya və Hersoqovinada separatizmin alovlandırılmasında ittiham edir. Yaxşı ki, müsahibə qısa alınmışdı. Yoxsa Aleksandroviç Serbiyanı İkinci Dünya müharibəsini də Moskva ilə əlbir olaraq başlamaqda ittiham edəcəkdi", – deyə Tonçev bildirib.

Qeyd edək ki, Ukraynanın Belqraddakı səfiri Aleksandr Aleksandroviç müsahibələrinin birində Serbiyanı Rusiyanın əlində alət olduğunu bildirmişdi.