Təbii qaz axtarışları üçün Şimali Kipr Türk Cümhuriyyətinə məxsus 3-cü bölgəyə daxil olan İtaliyanın ENİ şirkətinə aid “Saipem 12000” platforması ilə Türkiyə Sahil Mühafizə Xidmətinin döyüş gəmisi arasındakı toqquşmanın qarşısı son anda alınıb.

Axar.az xəbər verir ki, Kipr, Yunanıstan və Türkiyə arasında gərginliyə səbəb olan hadisə zamanı türk kapitan axtarış platformasının qarşısını almaq üçün təhlükəli addım atıb.

Məlumata görə, “Saipem 12000” platforması xəbərdarlıqlara baxmayaraq ərazini tərk etməyib. Bundan sonra onu əhatəyə alan türk döyüş gəmilərindən biri platforma istiqamətində irəliləməyə başlayıb. Toqquşma ehtimalının yüksək olduğunu nəzərə alan “Saipem 12000”in kapitanı türk gəmisi ilə rabitə əlaqəsi yaradaraq marşrutu dəyişməli olduğunu bildirib. Türk kapitan isə marşrutu dəyişməyəcəyini qəti şəkildə vurğulayıb. Yalnız bundan sonra “Saipem 12000” platforması istiqamətini dəyişərək ərazini tərk edib.

Qeyd edək ki, fevralın 9-da İtaliyanın ENİ şirkətinə aid “Saipem 12000” platformasının təbii qaz axtarışları üçün Şimali Kipr Türk Cümhuriyyətinin sahillərində yerləşən “3-cü bölgə”yə gəlməsi Türkiyənin narazılığına səbəb olmuşdu.