Rusiya Prezidenti Vladimir Putin Təhlükəsizlik Şurasının iclasını çağırıb.

Axar.az xəbər verir ki, toplantıda İŞİD-lə mübarizədə Rusiyanın atacağı addımlar, Ukrayna böhranı və Afrikada yayılan Ebola virusu ilə bağlı müzakirələr aparılıb.

Kremlin mətbuat katibi Dmitri Peskov verdiyi açıqlamada toplantı zamanı İŞİD-lə mübarizədə beynəlxalq hüquq çərçivəsində əməkdaşlığın müzakirə edildiyini bildirib.

Parisdə 40 ölkə ilə birlikdə İŞİD-ə qarşı mübarizəyə imza atdıqlarını xatırladan Peskov Moskvanın Suriya rəhbərliyinin icazəsi olmadan bu ökənin ərazisində hər hansı əməliyyatın reallaşdırılmasının əleyhinə olduqlarını bir daha vurğulayıb.

Bu arada Peskov Putinin noyabrda Avstraliyada təşkil olunacaq "G20" zirvəsinə qatılacağını və bunun üçün hazırlıqların getdiyini qeyd edib.

Xatırladaq ki, Avstraliyanın Xarici İşlər naziri Culi Bişop "G20" ölkələrinin Brisbendə keçiriləcək zirvəsinə Putinin dəvət edilib edilməməsi ilə bağlı məlumatının olmadığını bildirmişdi.