Rusiya Dövlət Dumasının deputat qrupu yetkinlik yaşına çatmayan qızın qanunsuz olaraq Türkiyədə saxlanılmasını araşdırmaq üçün bu ölkəyə göndəriləcək.

Axar.az xəbər verir ki, bu sözləri RİA-ya açıqlamasında Dumanın MDB məsələləri üzrə Komitəsinin sədr müavini Viktor Vodolatski deyib. O bildirib ki, komitə Türkiyə parlamentində həmkarları ilə görüşüb, bu məsələni aydınlaşdırmaq üçün deputat qrupu göndərilməsi barədə qərar verib.

“Deputatlar bu problemi türk həmkarları ilə birgə aydınlaşdırmaq və qızı anasına geri qaytarmaq üçün gedəcəklər”, - Vodolatski deyib.

O, Türkiyəyə göndəriləcək qrupda 3 deputatın olacağını qeyd edib.

“Bizim uşaqlarımızın qanunsuz olaraq xarici ölkədə saxlanılması kədərləndiricidir”, - o əlavə edib.

Qeyd edək ki, mətbuatda Zarina Albeqonovanın 10 yaşlı qızının keçmiş əri, Türkiyə vətəndaşı tərəfindən qanunsuz olaraq bu ölkədə saxlanıldığı barədə məlumat yayılıb. Bildirilir ki, Albeqonova 2004-cü ildə türklə Rusiyada ailə qurub. Ailənin dünyaya gələn övladları Rusiya vətəndaşlarıdır.

Adı açıqlanmayan Türkiyə vətəndaşı isə böyük qızlarını qanunsuz olaraq öz yanında saxlayır.