Qurtuluş Savaşının qalibiyyətlə bitməsindən sonra, 1922-ci ildə Osmanlı səltənəti ləğv edilir və sultan Vəhdəttin vətən xaini elan edilir. Lakin Vəhdəttin kiçik oğlu Məhmət Ərtoğrul ilə gizli şəkildə ingilis gəmisinə minərək Türkiyəni tərk edir və Maltaya qaçır.

Axar.az tarixi qaynaqlara istinadən xəbər verir ki, 19 may 1919-cu ildə Osmanlı hökuməti bölgədə vəziyyəti nizama salması üçün Mustafa Kamal Paşanı Samsuna göndərir.

Mustafa Kamal ölkənin bir çox yerlərində mitinqlər təşkil edir və milli suverenlik ideyasını kütlələr arasında yaymağa başlayır.

Ölkənin hər yerindən gələn insanlar 23 aprel 1920-ci ildə Ankarada Böyük Millət Məclisinə toplanırlar. Toplantıda Mustafa Kamal Paşa "Məclis Başçısı" seçilir.

Onun rəhbərliyi altında Türkiyə Qurtuluş Savaşına başladığını elan edir.

Xalq və nizamlı ordular İstanbulu işğal edən müttəfiq dövlətlərə qarşı inamla mübarizə aparırlar.

Lakin Mustafa Kamal Paşanın bu mübarizəsini Osmanlı sultanı Vəhdəttin üsyan olaraq qiymətləndirir. O, Mustafa Kamal Paşa və yoldaşlarını vətən xaini elan edib, haqlarında ölüm fərmanı imzalayır.

Qurtuluş Savaşının qalibiyyətlə bitməsindən sonra 1922-ci ildə Osmanlı səltənəti ləğv edilir və sultan Vəhdəttin vətən xaini elan edilir.

Lakin Vəhdəttin kiçik oğlu Məhmət Ərtoğrul ilə gizli şəkildə ingilis gəmisinə minərək Türkiyəni tərk edir və Maltaya qaçır.

24 iyul 1923-cü ildə İsveçrənin Lozanna şəhərində türk nümayəndələri ilə müttəfiq dövlətlər arasında sülh müqaviləsi imzalanır.

Həmin ilin 13 oktyabrında Ankara paytaxt elan edilir.

29 oktyabrda isə Mustafa Kamal Paşa millət vəkilləri ilə görüşdükdən sonra respublika yaradılması təklifini Türkiyə Böyük Millət Məclisinə təqdim edir. Məclis təklifi qəbul edir və "Türkiyə Cümhuriyyəti Dövləti" yaradıldığı elan olunur.

Mustafa Kamal dövlətin ilk prezidenti seçilir.

1925-ci ildən etibarən 29 oktyabr Türkiyədə Cümhuriyyət bayramı olaraq qeyd olunur.