Rusiyanın "Novatek" şirkətinin sədri Leonid Mixelson şirkətin istehsal etdiyi tankerlərdən birinə təyyarə qəzasında həlak olan "Total" prezidenti Kristof de Marjerinin adının verilməsi təklifi ilə çıxış edib.

Axar.az xəbər verir ki, Mixelson bunu Rusiya Prezidenti Vladimir Putinlə görüşü zamanı deyib.

"Biz gözəl partnyormuz Kristof de Marjerini itirdik. Tankerlərdən birinə onun adının verilməsilə bağlı ailəsinə müraciət etdik. Biz bu layihəni onunla birgə başlamışdıq. Hesab edirəm ki, bu, düzgün qərar olardı. Bu insan dünyada böyük hörmətə layiqdir", - Mixelson deyib.

Vladimir Putin də Mixelsonun fikrini dəstəklədiyini bildirib:

"Çox ləyaqətli insan idi və belə bir şəxsin xatirəsini əbədiləşdirmək çox yaxşıdır. O, çox yaxşı və etibarlı partnyor idi".

Qeyd edək ki, oktyabrın 21-də "Total" neft şirkətinin prezidenti Kristof de Marjerinin olduğu "Falkcon EX50" Vnukovo hava limanında qəzaya uğramışdı. Nəticədə de Marjeri də daxil olmaqla 4 nəfər həlak olmuşdu.