“Nyu York Tayms” qəzeti ABŞ Prezidenti Donald Trampın kürəkəni və baş məsləhətçisi Cared Kuşner və qardaşı Coşun 2017-ci ildə Səudiyyə Ərəbistanına səfərindən sonra Coşun şirkətinə milyonlarla dollar pul köçürüldüyünü iddia edib.

Axar.az xəbər verir ki, qəzet Cared Kuşnerin səfərindən bir gün əvvəl qardaşı Coşun Ər-Riyada səfər etdiyi və onun bir sıra səudiyyəli vəzifəli şəxslərlə görüşdüyünü yazıb. Coş Kuşnerin Ər-Riyadda investisiya ilə bağlı qatıldığı konfransdan 5 ay sonra şirkətinə 165 milyon dollar maliyyə dəstəyi göstərildiyi, görüşdən bir il sonra “Srayv Kapital” şirkətində 1 milyard dollar həcmində fond toplandığı qeyd edilib.

Məsələ ilə bağlı qəzetə açıqlama verən hüquqşünas Yan Baran "Srayv Kapital” tərəfindən idarə olunan investisiya fondunun Cared Kuşner üçün hüquqi cəhətdən problem təşkil etmədiyini deyib. O, Caredin Səudiyyə investisiyaları məsələsində Ağ Evdəki vəzifəsindən istifadə halı aşkarlanarsa, vəziyyətin dəyişəcəyini bildirib.